Sherq bilen gherb otturisidiki gürjistan 25 Nisan 2009 Cumartesi << Ana Sayfa - Bash Bet - Main Page>>

Ürkiye awazi radi'osi: 2004- yili amérika qoshma shtatliri we yawropaliqlarning qollishi bilen, ghayet zor ishlarni qilidighanliqini wede qilish arqiliq «gül inqilabi» qozghap hakimiyet béshigha chiqqan 41 yashliq gürjistan (groziye) jumhur re'isi sa'akashwili yolning nihayitini körüshke bashlidi. Gürjistan xelqi gherbning qollishigha érishken yash re'islirining sayisida, gherbtin zor miqdarda pul élip, yoqsulluqqa xatime bérishni, shimaliy atlantik ehdi teshkilati we yawropa ittipaqigha eza bolushni kapaletke ige qilip, shorluq teqdiri üstidin ghalib kélishni, parlaq we bay bir kelgüsi yaritishni we birdinla gherb elliri sépige qétilip, sinip atlimaqchi bolushni köngüllirige püküshken idi. Gürjistanning nöwettiki weziyiti nishan qilin'ghan nuqtidin tolimu yiraqta körünmekte.

Hörmetlik radi'o anglighuchilar! töwende ghazi uniwérsitéti iqtisad we igilik bashqurush pakoltéti, xelq'ara munasiwetler bölümining bashliqi proféssor doktor heyder chaqmaqning témigha munasiwetlik analizini hozurunglargha sunimiz...

.......................................................................................................................

Sa'akashwilini hakimiyet béshidin chüshürüwétishni meqset qilghan halda 2009- yili 9- aprilda bashlan'ghan kucha namayishliri, yalghuz gürjistan jumhur re'isining meghlubiyitila emes, eyni waqitta uninggha yantayaq bolghan gherbliklerningmu meghlubiyiti hésablinidu. Gherb elliri gürjistan'gha wede qilghan yardemlirini bermigendin sirt, sa'akashwili we gürji xelqini ruslarning aldida yalghuz tashlap qoydi. 2008- Yili 7- 12 awghost arisida yüz bergen rusiye – gürjistan urushida biterep turghan gherb elliri, urushtin kéyin 240 neper yawropaliq közetküchi bilen orush toxtitishni nazaret qilish wezipisini üstige aldi. Urush toxtitish kélishimnamisi tüzülgen bolsimu, ruslar gürjistan zéminidin pütünley chékinip chiqip ketmidi. Osétya we abxaziyaning musteqilliqini étirap qilghan ruslar, bu ikki rayonda xelq'aradiki barliq belgilimilerni ret qilip, 10 ming rus eskirini dawamliq turghuzmaqta we gherblik nazaretchilerning qanunluq pa'aliyet da'irisidiki jaylargha kirishigimu tosqunluq qilmaqta.

14 Neper öktichi gürji lider rusiyining qollishi astida sa'akashwili istipa bergen'ge qeder kucha namayishlirini dawamlashturidighanliqini élan qildi. Öktichilerning rehbiri, eyni zamanda prézidént namzatimu bolghan léwan gachéchiladzéning, sa'akashwilining istipa bérishining döletning saqliniwatqan mesililirini hel qilish üchün paydiliq bolidighanliqini élan qilishi, rusiye prézidénti médwédéwning gherb terebdari sa'akashwilining mensipidin ayrilishidin kéyin, gürjistanning qéyinchiliqlirini hel qilish üchün küch chiqiridighanliqini élan qilishi qatarliqlar bir tasadipiliq emes. Ruslar gürji xelqige, bizge yéqin bir kishini prézidént saylap chiqinglar we bizmu silerning mesililiringlarni hel qilayli, dégen ségnalni bérishtin ibaret. Eslide gürjistan xelqining xéli köp qismi sa'akashwilining mensipidin ayrilishini xalisimu, ruslarning qaytip kélishige qarshi bolghanliqi üchün, kucha namayishlirigha ishtirak qilishtin özlirini tartip turushmaqta.

.............................................................................................................................

Sa'akashwili istipa bermeydighanliqini tekrarlimaqta. Gürjistanning shimaliy atlantik ehdi teshkilati we yawropa ittipaqi ezaliqi yéqin kelgüsi üchün élip éytqanda bir shirin xiyaldin ibaret. Gherblikler, ruslar bilen qarimu qarshi bolup qélishtin özlirini qachurmaqta. Iqtisadiy we siyasiy yardemliri yéterlik emes. Ruslar ermenistan (erméniye) gha ezerbeyjan zémini bolghan qarabaghni ishghal qildurush arqiliq ermenistanni pütünley, ezerbeyjanni bolsa qismen özlirige qaritiwalghan. Eger, gürjistanmu rusiyining kontirolliqi asitigha kirip qalsa, gherb elliri kawkaz rayonigha «elwida» déyishke mejbur bolup qalidu.

Gérmaniye we fransiye mesilining béshidin tartipla gürjistan'gha köngül bölmekte. Yawropa ittipaqining ikki chong döliti hem özlirining imkaniyetlirini, hemde yawropa ittipaqining imkaniyetlirini gürjistanning mesililirini hel qilish üchün ishqa sélishi we bu yéterlik bolushi mumkin idi. Emma, némishqikin, ular bundaq qilishtin özlirini tartip kelmekte. Erkin we hör yashash barliq kishilerning heqqi, lékin gürjistanning parchilinishi we chékinip kétishi héchkim üchün paydiliq emes. Parchilinish choqum meydan'gha kélidighan ish bolsa, bu yéngi tüzülme rusiye we gherb ellirining menpe'etini emes, bu yerdiki namrat xelqning menpe'etini chiqish qilishi lazim. Gürji, abxaz we osét xelqlirining erkinlik we bayashatliq heqqidiki armanlirini impériyalist döletlerning pilanlirigha qurban qiliwetmeslik kérek.

http://www.trtuyghur.com/international/newsDetail.aspx?HaberKodu=5a9b985f-8812-4618-b1d2-a59b43f5de93